വാട്സ് ആപ്പ് നിരോധിക്കണമെന്ന് ആവശ്യപ്പെട്ട് സമര്‍പ്പിച്ച ഹരജി സുപ്രീം കോടതി തള്ളി. രാജ്യത്തെ പുതിയ ഐടി നിയമങ്ങള്‍ പാലിക്കുന്നതില്‍ വാട്സ്ആപ്പ് പരാജയപ്പെട്ടതിനാല്‍ അതിന്റെ പ്രവര്‍ത്തനങ്ങള്‍ നിരോധിക്കണമെന്നായിരുന്നു ഹരജിക്കാരന്റെ ആവശ്യം. ജസ്റ്റിസുമാരായ എം.എം. സുന്ദ്രേഷ്, അരവിന്ദ് കുമാര്‍ എന്നിവരടങ്ങിയ ബെഞ്ചാണ് ഹരജി തള്ളിയത്.
കേന്ദ്ര സര്‍ക്കാര്‍ പുറപ്പെടുവിച്ച ഉത്തരവുകള്‍ ലംഘിക്കുന്ന വാട്സ്ആപ്പിനെ നിരോധിക്കണമെന്നാവശ്യപ്പെട്ട് കെ.ജി. ഓമനക്കുട്ടന്‍ എന്നയാളാണ് സുപ്രീം കോടതിയെ സമീപിച്ചത്. നേരത്തെ കേരള ഹൈക്കോടതിയെയും ഇദ്ദേഹം സമീപിച്ചിരുന്നു. 2021ല്‍ ഈ ഹരജി തള്ളപ്പെട്ടതിനെ തുടര്‍ന്നാണ് സുപ്രീം കോടതിയില്‍ അപ്പീല്‍ സമര്‍പ്പിച്ചത്. വാട്സ്ആപ്പിന്റെ എന്‍ഡ്-ടു-എന്‍ഡ് എന്‍ക്രിപ്ഷന്‍ സംവിധാനം സന്ദേശങ്ങളുടെ ഉത്ഭവം കണ്ടെത്തുന്നതില്‍ നിന്ന് തടയുന്നതിനാല്‍ 2021ലെ ഐ.ടി നിയമങ്ങള്‍ക്ക് യോജിച്ചതല്ലെന്ന് ഡല്‍ഹി ഹൈകോടതിയില്‍ വാട്സ്ആപ്പ് അവകാശപ്പെട്ടതായി ഹരജിക്കാരന്‍
വാദിച്ചു. എന്നാല്‍ വാട്സ്ആപ്പിന്റെ സ്വകാര്യതാ നയം തന്നെ ചില സാഹചര്യങ്ങളില്‍ സന്ദേശങ്ങള്‍ സംഭരിക്കുന്നതായും ഉപയോക്താക്കളുടെ കോണ്‍ടാക്റ്റുകളിലേക്ക് ആക്സസ് നല്‍കുന്നതായും വ്യക്തമാക്കുന്നുണ്ട്.
സന്ദേശങ്ങളുടെ ആധികാരികത ഉറപ്പാക്കാന്‍ കഴിയാത്തതിനാല്‍ കോടതി സമന്‍സുകളും നിയമ നോട്ടീസുകളും നല്‍കുന്നതിന് വാട്സ്ആപ്പ് പോലുള്ള പ്ലാറ്റ്ഫോമുകളെ ആശ്രയിക്കുന്നത് അപകടകരമാണെന്നും ഹരജിക്കാരന്‍ ചൂണ്ടിക്കാട്ടിയിരുന്നു.
Related Articles
