തിരുവനന്തപുരം: ഭിന്നശേഷിക്കാർക്ക് നൽകിവരുന്ന ഏകീകൃത തിരിച്ചറിയൽ കാർഡ് ഇനി ആധികാരിക രേഖ. ഏകീകൃത തിരിച്ചറിയൽ കാർഡ് ഇവർക്ക് വിവിധ ആനുകൂല്യങ്ങൾ നൽകുന്നതിനുള്ള ഔദ്യോഗിക രേഖയാക്കി സർക്കാർ ഉത്തരവ് പുറത്തിറക്കി. ഭിന്നശേഷി അവകാശനിയമപ്രകാരമുള്ളതടക്കം വിവിധ ആനുകൂല്യങ്ങളും അവകാശങ്ങളും അനുവദിക്കുന്നതിനാണ് യു.ഡി.ഐ.ഡി കാർഡ് ആധികാരിക രേഖയാക്കി ഉത്തരവായത്. ചില സർക്കാർ വകുപ്പുകളും പൊതുമേഖലാ സ്ഥാപനങ്ങളും ഈ കാർഡ് അംഗീകരിക്കുന്നില്ലെന്ന പരാതിയുടെ സാഹചര്യത്തിലാണ് പുതിയ ഉത്തരവെന്ന് ഉന്നത വിദ്യാഭ്യാസ മന്ത്രി ആർ. ബിന്ദു അറിയിച്ചു. കാർഡ് ഇതുവരെ ലഭിച്ചിട്ടില്ലാത്തവർക്ക് ആനുകൂല്യങ്ങൾക്ക് ഉത്തരവുകൾ പ്രകാരമുള്ള രേഖകൾ മതിയെന്നും മന്ത്രി പറഞ്ഞു. സാമൂഹ്യനീതി വകുപ്പ് ആരോഗ്യ വകുപ്പുമായി സഹകരിച്ച് നടത്തുന്ന മെഡിക്കൽ ബോർഡ് പരിശോധനയുടെ അടിസ്ഥാനത്തിൽ ഭിന്നശേഷിക്കാർക്ക് നൽകുന്ന ഡിസെബിലിറ്റി സർട്ടിഫിക്കറ്റും തിരിച്ചറിയൽ കാർഡും, കേന്ദ്രസംസ്ഥാന സർക്കാരുകൾ, പൊതുമേഖലാ സ്ഥാപനങ്ങൾ, പി.എസ്.സി, കേന്ദ്രസംസ്ഥാന സർക്കാരുകൾക്കു കീഴിലുള്ള സ്വയംഭരണ സ്വയംഭരണ സ്ഥാപനങ്ങൾ, സർവകലാശാലകൾ, തദ്ദേശ സ്ഥാപനങ്ങൾ, സഹകരണസ്ഥാപനങ്ങൾ തുടങ്ങിയവ നൽകുന്ന ആനുകൂല്യങ്ങൾ ലഭിക്കാൻ ഈ കാർഡ് ആധികാരികരേഖയായി സ്വീകരിക്കണമെന്ന് ഉത്തരവുണ്ട്. ഇവർ നൽകുന്ന ആനുകൂല്യങ്ങൾക്കായി ഭിന്നശേഷിത്വം തെളിയിക്കാൻ മറ്റു സർട്ടിഫിക്കറ്റുകൾ ആവശ്യപ്പെടുന്നത് ബുദ്ധിമുട്ടുണ്ടാക്കുന്നതിനാൽ ഒഴിവാക്കണമെന്നും മുൻ ഉത്തരവിൽ വ്യക്തമാക്കിയത് ഒരിക്കൽ കൂടി ഓർമിപ്പിക്കുന്നെന്ന് മന്ത്രി ബിന്ദു വ്യക്തമാക്കി.
നിർദ്ദേശം കർശനമായി പാലിക്കാൻ എല്ലാ വകുപ്പു മേധാവികളും ഓഫിസർമാർക്കും സ്ഥാപനങ്ങൾക്കും നിർദ്ദേശം നൽകും. വീഴ്ച വരുത്തുന്ന ഉദ്യോഗസ്ഥർക്കെതിരെ കർശന നടപടികളുണ്ടാവുമെന്നും മന്ത്രി അറിയിച്ചു
